Edhe një aktakuzë kundër kryesuesit të Kuvendit Komunal në Viti

Gjilan – Prokuroria Themelore (Komunale) në Gjilan ka ngritur aktakuzë kundër Naim Pira, Ramadan Zuka, Avni Ostorgllava, Fatlum Demiri, Baki Musa, Arian Kuka dhe Bajram Pira.

Sipas aktakuzës në zgjedhjet parlamentare të Republikës së Kosovës të mbajtura më 12.12.2010, në qendrën e votimit në fshatin Pozheran të pandehurit Naim Pira kryetar dhe Ramadan Zuka, Avni Ostorgllava, Fatlum Demiri, Baki Musa e Arian Kuka dhe Bajram Pira anëtarë të komisionit votues kanë falsifikuar rezultatet e zgjedhjeve për deputet të Parlamenti të Kosovës, në atë mënyrë që gjatë dhe pas numërimit të votave kanë manipuluar me 861 vota, ashtu që subjekteve politike dhe kandidatëve konkurrues për anëtar të Parlamentit të Republikës së Kosovës, iu kanë shtuar apo hequr votat e dhëna nga qytetarët dhe pas kësaj i kanë regjistruar në mënyrë jo të saktë në formularët e rezultateve të kandidatëve, dhe në atë mënyrë kanë ndikuar në mënyrë të drejtpërdrejtë në rezultatet e votimit dhe atë në favor të subjekteve dhe kandidatëve të tyre të preferuar, duke i dëmtuar subjektet tjera politike dhe kandidatët e tyre me çka kanë kryer në bashkëveprim veprën penale “Mashtrim në votime” thuhet në aktakuzën e prokurorit Isuf Sadiku./rajonipress/