Edhe Kllokoti në hall nga vërshimet

Kllokot – Reshjet e ditëve të fundit shkaktuan vërshime të shumta në territorin e Komunës së Kllokotit e sidomos në fshatin Mogillë.

Në kilometrin e parë në rrugën Verbovc – Viti, shkak i të reshurave të shumta, dhe Ura e cila ishte bllokuar nga mbeturinat, mbi 200 hektarë janë vërshuar, por dëme ka pasur edhe në ekonomitë familjare.

Një pjesë e fajit për këto vërshime në fshatin Mogillë, janë si pasojë e një qytetari të pandërgjegjshëm i cili ka ndërtuar një Urë improvizuese në lumin i cili kalon në periferi të vendbanimit dhe si pasoj e kësaj ka shkaktuar dëme të konsiderueshme në kulturën bujqësore të grurit, por edhe në ekonomitë familjare thuhet në njoftimin e zyrës për informim të kësaj komune.

Drejtori i Administratës dhe Shërbimeve publike në Komunën e Kllokotit, Hidajet Ahmeti, duke parë gjendjen dhe efektet negative që ka pasur kjo Urë, tash e dy vite, që pas çdo të reshure ka pasur vërshime të gjithë fshatit Mogillë, në bashkëpunimin me inspektoratin e Komunës dhe me ndihmën e Policisë morën vendim që të rrënohet Ura dhe pas rrënimit u lirua lumi dhe vërshimet pushuan./rajonipress/