Edhe banorët e Letnicës diskutojnë për buxhetin komunal

Viti – Në Letnicë është mbajtur diskutimi publik me banorët e këtij lokaliteti për hartimit të buxhetit komunal për vitet 2016-2018 konkretisht të listës për investime kapitale.

Ibrahim Rama, Drejtor për Ekonomi, Financa dhe Zhvillim duke prezantuar buxhetin komunal para banorëve të Letnicës, potencoi se vetëm 15.9% e buxhetit të kësaj komune janë të dedikuar për investime kapitale.

Ai tha se kjo shifër nuk është e kënaqshme por përmes donacioneve, investimet shkojnë në shuma milionëshe.

Gjatë këtij takimi Drejtori Rama i ka njoftuar banorët e këtij lokaliteti edhe për procedurat dhe ndarjen e buxhetit në kategoritë e ndryshme ekonomike.

Ndërsa në pjesën e dytë të këtij takimi, banorët kanë parashtruar kërkesat dhe nevojat e tyre që si prioritet i paraqiti kryetari i këshillit të fshatit Letnicë Shin Gjoni, ndër të cilat u veçua rregullimi i rrugës me zhavorr, mandej i hapjes dhe rregullimit të një rruge në afërsi të shkollës, asfaltimi i rrugës së shkollës, por si kërkesë u parashtrua edhe mungesa e mësuesve, për të cilën kërkesë drejtori Rama tha se është çështje e Ministrisë së Arsimit dhe inkuadrimi i mësuesve bëhet në proporcion me numrin e nxënësve.

Debati për hartimin e buxhetit në Letnicë ishte i fundit që u mbajt në lokalitete, me që rast gjatë këtij muaji Komuna e Vitisë ka mbajtur 20 diskutime publike, 16 me banorë të lokaliteteve të ndryshme dhe 4 me kategoritë të ndryshme të shoqërisë./rajonipress/