Edhe Artana formon komision komunal për identifikimin e pronave publike

Gjilan – Në mbledhjen e fundit të Kuvendit Komunal të Artanës këshilltarët komunal kanë vendosur dhe aprovuar disa vendime duke përfshirë edhe atë për formimin e komisionit komunal për identifikimin e pronave dhe vlerësimin e pronave për dhënien në shfrytëzim.

Në seancën e së mërkurës të Asamblesë Komunale në Artanë të udhëhequr nga Shefkije Mehmeti e ku merrte pjesë edhe Bajrush Ymeri janë diskutuar e aprovuar disa vendime të rëndësishme komunale e që e rregullojnë veprimtarinë e institucioneve komunale.

Pas shumë diskutimeve nga ana e këshilltarëve komunal dhe sqarimeve profesionale që ka dhënë Bajrush Ymeri këshilltarët kanë aprovuar vendimin për Aprovimin e Statutit të Qendrës për Punë dhe Mirëqenie Sociale, pastaj vendimin për shqyrtimin e planeve për përmirësimin e shërbimit të ujësjellësve dhe trotuareve, vendimin për formimin e komisionit komunal për identifikimin e pronave dhe vlerësimin e pronave për dhënie në shfrytëzim, vendimin për Participimin e Komunës në Bujqësi për sigurimin e motokultivatorëve në vlerë prej 8,616,66 € në kuadër të Asociacioneve të Komunës së Kamenicës, vendimin për Ridestinimin e subvencioneve për bujqësi, vendimin për mbështetjen e projektit të studimit të fizibilitetit për krijimin e zonës ekonomike në Llabjan në vlerë 1,250 €./rajonipress/