E konfirmon agjenti: Shqipëria e kërkon Xhimshitin

Nuk është fshehtësi që Kombëtarja e Shqipërisë është duke u interesuar për mbrojtësin shqiptar Berat Xhimshitin. 21-vjeçari që aktivizohet me Përfaqësuesen e Zvicrës U21, ka shprehur dëshirën e tij që të luaj me ekipin e Gianni De Biasit, dhe iu është bërë gati ftesa nga trajneri italian.

Së fundmi këtë lajm e ka konfirmuar edhe agjenti i lojtarit, Michel Urscheler i cili ka deklaruar se Shqipëria është duke u interesuar për lojtarin. “Shqipëria po përpiqet prej 3 muajsh për Beratin. Për momentin ai nuk ka një pasaportë shqiptare, dhe nuk e di sa mund të zgjasin këto procedura dhe zyrtarizmi nga UEFA i ndryshimit të Kombëtares, por nuk besoj se mund të bëhen përpara ndeshjeve të tetorit.

Megjithatë, ne nuk kemi marrë akoma një vendim. Këtë javë do takohem me Beratin për të diskutuar. Është vendimi i tij. Unë thjesht do i këshilloj që ky vendim nuk është vetëm për tani, por për evropianin pas 2 vitesh, për botërorin pas 4 vitesh apo për gjithë turnetë e tjerë. Ai duhet të zgjedhë se kush është më e mira për të ardhmen e tij”, tha Urscheler, që nënkupton se i sugjeron Xhimshitit të presë Zvicrën.