E diela, ditë pune për Lutfi Hazirin

Gjilan – Kryetari i Komunës së Gjilanit, Lutfi Haziri së bashku me bashkëpunëtorët, ka dalë të dielën në terren për t’i parë punimet në rindërtimin e rrugëve kryesore të qytetit, “Zija Shemsiu” (përballë Universitetit Kadri Zeka), “Haqif Tetotva” (përballë postës së vjetër), “Madeline Albright” (rruga e Prishtinës) si dhe të ashtuquajturës rruga e ish-Diagnozës.

Kryetari Haziri u shpreh i kënaqur me cilësinë e punimeve, ndërsa tha se në kuadër të rindërtimit të rrugëve, po rindërtohet edhe rrjeti i ri i kanalizimit dhe ai i ujësjellësit.

“Realizimi i katërshes së madhe të prioriteteve, në të cilën hyn programi i infrastrukturës bazike, po ecën sipas planit. Jam i kënaqur me cilësinë dhe dinamikën e punëve në rindërtimin e këtyre rrugëve, në kuadër të të cilave po bëhet edhe rrejti i kanalizimit dhe ai i ujësjellësit në mënyrë që të përfundohet të gjitha në të njëjtën kohë. Disa nga këto rrugë tashmë kanë përfunduar dhe po presim që të përfundoj shumë shpejt asfaltimi i rrugës së Prishtinës për të vazhduar edhe me rrugët tjera në qytet e fshatra”, është shprehur me këtë rast kryetari Haziri.

Kryetari i Gjilanit ka paralajmëruar fillimin e shpejt të punimeve edhe në hyrje-daljet e qytetit, përkatësisht rrugën Gjilan-Bujanoc, Gjilan-Prishtinë e më vonë edhe Gjilan-Ferizaj./rajonipress/