Eko Higjiena

E ardhmja pa Chavezin

/ 6 minuta lexim
Hidromorava

Presidenti venezuelas, Hugo Chavez, tash e tri javë nuk është parë publikisht. Përkeqësimi i gjendjes së tij shëndetësore ka bërë që komentuesit e shumë mediave të mëdha botërore si lajm kryesor të kenë spekulimet mbi ardhmërinë e Venezuelës, por pa liderin e saj problematik.

Presidenti venezuelas nuk është parë në publik tash e tri javë, gjegjësisht që nga koha kur u raportua se po vuante nga komplikimet e shfaqura pas intervenimit kirurgjikal në Kubë, me qëllim të shërimit të kancerit, nga i cili Chavez vuan tash sa kohë.

Mediat shtetërore në Venezuelë po emitojnë rregullisht fjalë nderimi kushtuar presidentit, përderisa qeveria pohon se gjendja e tij mbetet “stabile” por “delikate”.

Mirëpo, lëvizja kryesore opozitare në vend ndërkohë i ka bërë thirrje pushtetit që të jetë më sinqertë lidhur me gjendjen e tij shëndetësore.

Nga ana tjetër, më 10 janar Chavez do të duhej të bënte betimin për mandatin e tij të ri gjashtëvjeçar si president.

Reagimet në Amerikën Jugore

Në editorialin e gazetës ditore kolumbiane ‘El Colombiano’ nënvizohet se, Qeveria e Venezuelës tashmë po shqyrton disa skenarë të mundshëm, meqenëse mungesa e presidentit Chavez në këtë ceremoni është gati e pashmangshme – qoftë për shkak të vdekjes, apo për shkak të “paaftësisë së tij absolute”.

Gazeta argjentinase ‘Clarin’ pohon se vdekja e Chavez do të mund t

i paraprinte “një ndryshimi esencial, por edhe të vetë kualitetit të lëvizjes së tij – e cila paraqet një magmë majtistësh, popullzimi të vrazhdët dhe oportunistësh regjionalë – të cilën ai e ka drejtuar dhe koordinuar mbi 14 vjet, mbi bazat e dollarëve të fituar nga nafta”.

Po ashtu, gazeta thekson se, “socializmi i shekullit 21, respektivisht një ri-realizim i ëndrrave revolucionare të viteve të 60’a dhe të 70’a”, siç parapëlqente Chavez të thoshte shpesh, kurrë s’do të paraqes asgjë më tepër se një mirëqenie të bazuar në shpenzimin e të hyrave të krijuara nga nafta.

Në ndërkohë, edicioni i gazetës ‘Wall Street Journal’ (WSJ) për Amerikën Jugore, pohon se fokusimi i vazhdueshëm në shëndetin e presidentit e ka pamundësuar Qeverinë e Venezuelës që të adresojë “çështjen e çarjeve ekonomike në rritje”. Rrjedhimisht, në artikullin e WSJ thuhet se “pas marrjes së përgjegjësive” pasardhësin e Chavez e pret “një aterrim tejet i vështirë”.

Pjesa tjetër e botës

Uji Dea

Çështjet ekonomike duket se janë shqetësimet kryesore edhe të gazetës kineze ‘China Daily’, sipas së cilës: “Gjendja shëndetësore e Chavez po përcillet nga afër edhe nga shtetet e tjera të Amerikës Latine, të cilat përfitojnë nga ndihma gjeneroze e tij, por edhe nga investuesit në Wall Street, të cilët joshen nga obligacionet fitimprurëse dhe shumë të tregtuara të Venezuelës”.

Në numrin e saj të 2 janarit, gazeta spanjolle ‘ABC’ nënvizon se presidentit Chavez tashmë i është caktuar edhe koha kur do të hiqet nga aparatet që e mbajnë në jetë.

”Zyrtarët venezuelas thonë se Chavez është ende gjallë, megjithëse ata duket se vetëm sa janë duke e përgatitur shtetin për lajmin e vdekjes së liderit bolivarin të vendit”, pohon ‘ABC’.

Në Rusi ndërkaq, televizioni ‘Rossiya 1’ ka njoftuar se autoritetet e Venezuelës i kanë mohuar lajmet e disa mediave spanjolle se presidenti Chavez është në komë. Televizioni rus ka dhënë edhe detaje lidhur me operacionin e liderit venezuelas, derisa ka sqaruar se ky operacion është kryer nga një ekip mjekësor që në Kubë kishte ardhur nga Rusia, me qëllim që t’iu asistonte kolegëve kubanezë.

E web-faqja e televizionit iranian ‘Press TV’ ka transmetuar raporte në të cilat citohen deklaratat e zyrtarëve venezuelas, se gjendja shëndetësore e Chavez është stabile.

Nga ana tjetër, gazeta indiane ‘The Hindu’ vëren se krijimi i rezervave të mëdha të naftës në Venezuelë nënkupton se gjendja shëndetësore e Chavez, por edhe “nervozizmi dhe dyshimet” për të ardhmen e tij, nënvizojnë rëndësinë që kjo gjendje ka për vendin.

“Përkundër portretizimit së gjendjes së tij shëndetësore si të përmirësuar, përkrahësit e tij tani po e kuptojnë se ai s’do të mund të vazhdojë kështu përgjithmonë. Madje, edhe po qe se sistemi i zhdërvjelltë shëndetësor kubanez arrin që ta mbajë gjallë, fuqia dhe mundësitë e tij për ta ruajtur imazhin e deridjeshëm… s’duket të jenë të arritshme. Por, mbetet pikëpyetje se sa kohë do t’i duhet opozitës – dhe mbështetësve të saj jashtë vendit – për arritjen e fuqisë së duhur për përfundimin e erës së tij”, thuhet në artikullin e gazetës indiane.

Thashethemet mbi vdekjen e Chavez

Ka disa ditë që në internet kanë filluar të qarkullojnë thashetheme, se presidenti i Venezuelës, Hugo Chavez, në fakt ka vdekur. Sipas kolumnistit të agjencisë Reuters për Amerikën Jugore, Raul Gallegos – i cili momentalisht ndodhet në Venezuelë – është shumë e vështirë që këto thashetheme të konfirmohen. Sipas tij, për këtë arsye edhe vetë opozita venezuelase ka kërkuar nga qeveria që të dalë publikisht me të vërtetën mbi shëndetin e Chavez.

“Pavarësisht asaj se ai mund të jetë i vdekur, apo edhe të jetë në gjendje të rëndë shëndetësore, na mbetet që të presim një konfirmim nga Qeveria e Venezuelës, e cila do të njoftojë për këtë gjë. Aktualisht ka shumë spekulime, por është vështirë të dihet nëse ato janë të vërteta ose jo”, u shpreh Gallegos për radion ‘Voice of Russia’.

Në ndërkohë një mjek i njohur venezuelas, emri i të cilit nuk u bë i ditur, por i cili është në kontakt të vazhdueshëm me ekipin mjekësor të Chavez, deklaroi se presidenti venezuelas po i jeton ditët e tij të fundit. BBC