Dyshohet për abuzim me listat e shoqatave të luftës për regjistrim në UP

Përveç refuzimit për t’i regjistruar me automatizëm në Universitetin e Prishtinës mbi 1000 kandidatë të propozuar nga shoqatat e dala nga lufta, janë hedhur dyshime se ky numër edhe është i fryrë, shkruan sot Koha Ditore.

Për më tepër që procesi i verifikimit të veteranëve, dëshmorëve apo invalidëve të luftës, pritet të nxjerrë shifra më të vogla sesa numri i pretenduar për këtë status shoqëror.

I bie se jo të gjitha kërkesat dhe privilegjet që u janë dhënë nëpër vite nëpër institucione, atyre dhe familjarëve, kanë qenë të arsyeshme.

E paarsyeshme tash vlerësohet të jetë edhe kërkesa për pranimin në UP pa kurrfarë kriteri profesional të mbi 1000 kandidatëve të “përzgjedhur” nga shoqatat.

Dyshime se shoqatat kanë manipuluar me këto lista, ka shfaqur edhe njohësi i çështjeve të arsimit, Xhavit Rexhaj. Ai ka thënë për “Kohën Ditore” se ka mospërputhje në mes aplikantëve për statusin e veteranit të luftës dhe atyre që pritet të pranohen si të tillë.