Dymbëdhjetë rezolutat e pazbatuara të Kuvendit
Nga fillimi i procesit të dialogut Kosovë – Serbi, përkatësisht nga viti 2011, Kuvendi i Kosovës i ka miratuar 12 rezoluta të ndryshme, me anë të së cilave është artikuluar qëndrimi i këtij institucioni kundrejt procesit të dialogut, por të njëjtat nuk janë zbatuar asnjëherë deri më tani nga Qeveria, shkruan sot Gazeta “Zëri”.
Organizatat joqeveritare që e monitorojnë punën e Kuvendit kanë deklaruar për gazetën “Zëri” se moszbatimi i këtyre rezolutave të Kuvendit ka ndodhur pikërisht për shkak se ekzekutivi i vendit nuk ka dashur të dëshmojë transparencë në këtë proces.
Violeta Haxholli, hulumtuese në Institutin Demokratik të Kosovës (KDI), në një prononcim për gazetën “Zëri” ka thënë se delegacioni i Kosovës në dialog me Serbinë nuk i ka përfillur këto rezoluta, ku, siç thotë ajo, procesin e bisedimeve e ka bërë shumë jotransparent.
Deputetja nga radhët e koalicionit qeverisës (AAK), Time Kadriaj, ka thënë për gazetën “Zëri” se rezolutat e Kuvendit janë obligative dhe si të tilla janë zbatuar nga Qeveria.