Dy shtetas të Maqedonisë së Veriut ndalohen në Gjilan për kalim të paligjshëm të kufirit

Gjilan – Policia e Kosovës ka ndaluar dy shtetas të Maqedonisë së Veriut, të cilët dyshohet se kanë kaluar në mënyrë të paautorizuar vijën kufitare në territorin e Kosovës.

Sipas raportit policor, rasti ka ndodhur më 6 korrik 2026, rreth orës 17:00, në fshatin Dunavë të Gjilanit. Gjatë kontrolleve në terren, zyrtarët policorë kanë ndaluar dy automjete të drejtuara nga dy meshkuj, shtetas të Maqedonisë së Veriut.

Hetimet fillestare kanë konstatuar se të dyshuarit kishin hyrë në Kosovë duke kaluar në mënyrë të paligjshme vijën kufitare, jashtë vendkalimeve të autorizuara.

Lidhur me rastin është iniciuar procedurë penale për veprën “Kalimi i paautorizuar i vendkalimeve kufitare apo i vijës kufitare”. Me vendim të prokurorit të shtetit, pas ndërmarrjes së veprimeve procedurale, të dyshuarit janë liruar në procedurë të rregullt, ndërsa rasti do të trajtohet në përputhje me legjislacionin në fuqi./rajonipress/