Dumoshi konfirmon investimet në stadium, teatër, palestër e infrastrukturën e rinisë së Gjilanit

Gjilan – Kryetari i Komunës së Gjilanit, Lutfi Haziri, ka marrë mbështetje të madhe nga ministrja e Kulturës, Rinisë dhe Sportit, Vlora Dumoshi, për realizimin e disa projekteve që kanë të bëjnë me këto tre resorë, gjatë vizitës së kësaj të fundit në Komunë.

“Ministren Dumoshi e njoftova për aktivitetet e kulturës, rinië dhe sportit. E falënderoj shumë për solidaritetin dhe mbështetjen që ma dha mua dhe qytetarëve të Gjilanit. Stadiumi, teatri, palestra e infrastruktura e rinisë, janë disa programe që do të punojmë së bashku”, ka thënë pas takimit, kryetari Haziri.

Ai ka shfaqur besimin që ministra Dumoshi do t’i avancojë edhe më shumë tre sektorët e mëdhenj, në kuadër të kësaj Ministrie.

“Ka qenë insistuese që kjo Ministri të mos shkrihet, për shkak të interesit të kulturës, rinisë dhe sportit”, ka thënë Haziri.

Kurse, ministrja e Kulturës, Rinisë dhe Sportit, Vlora Dumoshi, e ka falënderuar kryetarin Haziri për pritjen dhe ka shfaqur konfirmimin për investimet në fushat e përmendura.

“E njoftova kryetarin që do të ketë investime në stadiumin e qytetit sipas standardeve të UEFA, në përfundimin e palestrës e sporteve në Zhegër, disa investime në palestrën “Bashkim Selishta –Petriti dhe investimet e nevojshme në teatër”, ka thënë Dumoshi.

Ajo ka surprizuar Hazirin, teksa ka konfirmuar se shumë shpejtë do të fillojnë me ndërtimin e dy fushave të tenisit.

“Kështu që, kryetar, gjejeni sa më shpejtë vendin për ndërtimin e këtyre fushave”, theksoi ministrja Dumoshi.

Pas takimit, Haziri e Dumoshi, kanë vizituar teatrin e qytetit dhe stadiumin e qytetit, ku në këtë të fundit, po vazhdojnë punimet e rindërtimit./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).