Duke u marrë me çështjen Kosovë-Serbi, Biden sinjalizon interes në Evropë

Presidenti i SHBA-së, Joe Biden, edhe pse ishte i ngarkuar me çështje të brendshme, është marrë me mosmarrëveshjen e gjatë mes Serbisë dhe Kosovës, me letra që i nxisin udhëheqësit e të dy vendeve të normalizojnë marrëdhëniet bazuar në “njohjen reciproke”, transmeton Indeksonline.

Voa raporton se, letrat përfaqësojnë një ndryshim nga politika e Donald Trump, administrata e të cilit ishte përpjekur të linte mënjanë çështjen e njohjes ndërsa kërkonte bashkëpunimin ekonomik si një mënyrë për ndërtimin e besimit mes dy vendeve.

Kjo çështje ka një jehonë të veçantë për Biden, djali i ndjerë i të cilit, Beau, dikur shërbeu si këshilltar ligjor në Kosovë. Në cilësinë e tij të dikurshme si nënkryetar, Biden vizitoi Kosovën në vitin 2016 dhe mori pjesë në ceremoninë e emërimit të autostradës Joseph R. “Beau” Biden III.

Por analistët thonë se duke u marrë me një nga mosmarrëveshjet e Evropës, Biden po sinjalizon që administrata e tij synon të përfshihet më shumë në çështjet me interes për aleatët evropianë të Amerikës.

“Ju e keni presidentin e ri amerikan që do të angazhohet në sigurinë evropiane, dhe veçanërisht në Ballkan në një mënyrë që presidenti Trump nuk ishte“, thotë Charles Kupchan, një anëtar i vjetër i Këshillit për Marrëdhëniet me Jashtë.

“Unë mendoj se ky është përgjithësisht një lajm i mirë dhe mendoj se do ta shihni që ai do të punojë më ngushtë me Bashkimin Evropian“.

Frank Wisner, një ambasador i pensionuar në SHBA i cili shërbeu si i dërguari special i SHBA-së në bisedimet e mbështetura nga OKB që çuan në shpalljen e pavarësisë së Kosovës në vitin 2008, thotë se pozicioni i Biden është i rrënjosur në idenë se Evropa do të jetë e plotë dhe e lirë.

Ai tha se qëllimi i Amerikës është “që Kosova dhe Serbia të pajtohen dhe që Serbia të njohë pavarësinë e Kosovës”./Indeksonline/