Drita vazhdon me fitore
Në kuadër të javës së 10-të, të Ipko Superligës së Kosovës në futboll, futbollistët e Dritës me meritë arritën të mposhtin Ferizajin në fushë të saj me rezultat 0-2.
Futbollisti më i mirë në fushë, Xhevdet Shabani, sot ishte i pandalshëm për mbrojtjen e Ferizajit, në dy asistet e tij bashkëlojtarët e tij arritën t`i konkretizojnë në gola.
Sulmuesi i Dritës, Xhevdet Shabani pas një aksioni të mirë nga 18 metra, gjen Betim Haxhimusën i cili nuk e pati të vështirë të mposht portierin vendas Blakqorin, duke sjell “bardh e kaltërtit” e Dritës në epërsi.
Kur gjithçka po merrte fund, edhe njëherë në minutën shtesë në atë 95-të, Xhevdet Shabani edhe njëherë gjen mirë rezervistin Haxhineziraj, i cili nga 7-8 metra vulos gjithçka në këtë takim.
Futbollistët e Ferizajit, rastin më të mirë në ndeshje e kishin në minutën 53-të, kur Haliti i vetmuar dështon ta mposht Rexhepin e Dritës.
Futbollistët e Ferizajit plot 14 minuta ishin me një futbollist më pak në fushë, pasiqë në minutën e 76-të, arbitri Shala e ndëshkon për të dytën herë me karton të verdhë e pastaj të kuqin Krist Markun, pasi një ndërhyrje të palejuar në Shaqirin e Dritës.
Me këtë fitore skuadra e Dritës ka bërë një hap gjigant drejt kreut të tabelës.
Trajneri i Dritës, Shpëtim Duro, pas ndeshjes ka deklaruar.
“Në pjesën e parë zhvilluam lojë të mirë, ndërsa të dytën në 20 minutat e parë nga rëndësia e pikëve luajtëm jo mirë, por në përgjithësi ne arritëm ti marrim tri pikë nga kjo ndeshje dhe dalëngadalë po marrim ritmin e duhur, me rëndësi është se futbollistët po kuptojnë filozofin e lojës sime por ende jemi mbrapa me pikë nga pozitat e para”.
Në javën e 11-të, Drita është nikoqire e KEKU-t./rajonipress/