Drita “shëndrit” në Podujevë

Skuadra e Dritës ka shënuar fitore të rëndësishme në stadiumin “Zahir Pajaziti” në Podujevë, duke mposhtur Llapin me rezultat 0:2.

Me fitoren e arritur në Podujevë, “Intelektualët” kanë bërë një hap të madh drejt titullit të kampionit. Të parët që rrezikuan në ndeshje, ishin vendasit.

Në minutën e 20-të, pas rishikimit në VAR, gjyqtari kryesor i ndeshjes akordon penallti për Llapin, pasi Besnik Krasniqi i Dritës, kishte luajtur me dorë.

Përgjegjësin për penallti e mori Festim Alidema, i cili shpërdori këtë mundësi të artë duke e dërguar topin jashtë kornizës së portës. Pjesa e parë u mbyll pa gola. Në minutën e 60-ta, Drita kalon në epërsi.

Ilir Blakqori pason bukur në zone për Blend Baftiun, i cili me një goditje të saktë shënon për 0:1.

Në minutën e 93-të, skuadra vendëse – Llapi sulmonte me gjithë forcat, por mysafirët arrijnë që me një kundërsulm të gjejnë golin e dytë, nëpërmjet rezervistit Ovoukan.

Drita me këtë fitore qëndron në pozitën e parë por tani me 3 pikë më shumë, pasi Ballkanin ndau pikët me Prishtinën.

Në xhiron e ardhshme e cila zhvillohet të dielën, Drita është nikoqire e Ballkanit – ndeshje kjo e cila mund të vendos edhe titullin e kampionit./rajonipress/