Drita pret të burgosurin Wilson!

Skuadra e Dritës në basketboll në konkurrencën e meshkujve bëri shumë ndryshime duke mos u rehatuar me lojtarët e huaj. Një ndër përforcimet e para të stinorit ishte qendra amerikane, Fabo Wilson. Ky i fundit qëndroi te Drita për dy muaj, duke lënë mbresa të mëdha te kryetari i skuadrës gjilanase, Fazli Fazliu. Pas përfundimit të stinorit vjeshtor, Drita ka liruar të gjithë basketbollistët e huaj, duke kërkuar që të përforcohet me lojtarë të rinj.

Por, Wilson do të jetë një nga lojtarët i cili do të rikthehet në Kosovë në pranverë. Megjithatë, një gjë pengon rikthimin e tij te skuadra e Dritës. Me t’u rikthyer në vendlindjen e tij, Wilson është arrestuar dhe është ende duke qëndruar në burg. Kësisoj, gjilanasit janë duke pritur lirimin e tij nga burgu për ta sjellë përsëri në klub.

“Kam dëgjuar se pasi është rikthyer Wilson në vendlindjen e tij në SHBA është arrestuar dhe është në burg. Nuk kam informacione se për çfarë arsyeje është arrestuar, por e di se ai është në burg”, deklaroi Fazilu për gazetën Arena. Ai tutje vazhdoi duke thënë se me basketbollistin amerikan ka kontratë profesionale dhe do të pres të lirohet nga burgu për ta rikthyer sërish në Gjilan…(Arena).