Drita pëson humbje në Skenderaj

Në stadiumin “Bajram Aliu” në Skenderaj i mbushur me lloç e ujë, Drenica ka arritur ta mposht Dritën me rezultat 2-1 duke e larguar edhe më shumë nga kreu i tabelës.

Drenica u tregua e pa kompromis në fushën e saj e cila në një fushë tejet të vështirë, dhe ka arritur që skuadrës së Dritës ti shkakton humbje tejet të rëndësishme.

Vendasit arrijnë në epërsi në minutën e 8 të ndeshjes, Fatlum Gashi ishte ai i cili nga distanca shënon gol të bukur duke mposhtur portierin Maloku 1-0.

Në minutat shtesë të pjesës së pare, mbrojtësi Cuculi në zonë luan me dorë e nga pika e bardhë i pagabuar ishte futbollisti më i mirë i Drenicës, Kreshnik Uka, i cili me lehtësi mposht Malokun 2-0.

Në fillim të pjesës së dytë futbollistët e Dritës reaguan shumë shpejt, ku nëpërmjet Marko Simonivskit arrin të ngushtojnë epërsinë në 2-1.

Gjerë në fund të ndeshjes futbollistët e Dritës kishin më tepër nga loja por sulmuesit e saj nuk ishin të rrezikshëm pranë portës së portierit të Drenicës, Florijan Smakiqit.

Pas ndeshjes, trajneri i Dritës, Ardian Nuhiu, deklaroi. “Edhe pse ishte fushë e vështirë, nuk e justifikoj, sepse ishte e njëjtë për të dyja ekipet. Skuadra kundërshtare atë që krijoi edhe e shfrytëzoi. Sot ishte maksimumi, atë që krijuam ndoshta nuk i realizuam sikurse kundërshtari. Nuk diskutohet që na penalizon, por ne nuk do të dorëzohemi. I marr të gjitha përgjegjësitë për këtë disfatë. Kemi 3-4 ditë për t’u përgatitur për ndeshjen e radhës. Është ndeshje derbi dhe është mirë për shkak se ekipi gjen motivin për t’iu qasur më mirë ndeshjes. U kërkoj ndjesë shikuesve të cilët i falënderoj për mbështetje. Presim që t’i gëzojmë në ndeshjet e radhës”.

Me këtë humbje Drita shuan edhe më shumë gjasat e saja për titull të kampionit duke u renditur në pozitë të tretë me 41 pikë.

Në mesjavë Drita është nikoqire e derbit të madh lokal me Gjilanin./rajonipress/