Drita nuk njeh kundërshtar, mposht Drenicën në “Bajram Aliu”

Kampioni aktual Drita e cila është edhe lidere në futbollin e Kosovës, me lojë të mirë ka mposhtur Drenicën në stadiumin “Bajram Aliu” në Skenderaj, për ta mbajtur pozitën e parë.

Futbollistët e Drenicës gjatë 90 minutave asnjëherë nuk arritën ta rrezikojnë portën e portierit të Dritës, Leutrim Rexhepit.

Futbollistët e Dritës arrinë në epërsi në minutën shtesë të pjesës së parë, kapiteni Ardian Limani nga 30 metra gjenë Ajzerajn i cili me kokë mposht portierin Arion Ymerin.

Në fillim të pjesës së dytë në minutën e 48-të, Lushtaku në mënyrë të palejuar ndal Ajzerajn duke shkaktuar penallti, e dënimin më të rënd të futbollit e ekzekuton Fidan Gërbeshi për të realizuar për 0-2.

Në fund të ndeshjes në minutën e 90-të, edhe një herë Limani asiston bukur gjerë tek Betim Haxhimusa i cili me gjuajtje precize nga 15 metra detyron portierin e Drenicës ta nxjerr topin nga rrjeta e tij për rezultatin përfundimtar 0-3.

Pas ndeshjes trajneri i Dritës, Ardian Nuhiu, deklaroi.
“Goli erdhi në momentin e duhur, nuk e patëm freskinë për shkak të orarit të ngjeshur, por në pjesën e dytë e kontrolluam ndeshjen mirë dhe pritem gabimet e kundërshtarit, këto pikë janë tejet të vlefshme ne vazhdojmë për javët e ardhshme”.

Drita në javën e 18-të, ballafaqohet me Arbërinë në Gjilan./rajonipress/