Drita mposht “Minatorët” e Trepçës
Gjilan – Hendbollistët e Dritës në kuadër të javës së 10-të, të Superligës së Kosovës në hendboll, në Palestrën Sportive “Bashkim Selishta-Petriti”, në Gjilan në pranin e 200 shikuesve kanë mposhtur hendbollistët e Trepçës me rezultat 32-28.
Hendbollistët e Dritës edhe në këtë ballafaqim shpalosën potencialin e tyre hendbollistik, duke mos rrezikuar në asnjë moment fitoren tejet të rëndësishme përball Minatorëve të Trepçës.
Në pjesën e parë, hendbollistët e Dritës treguan lojë sulmuese e sulm efikas duke përmbyll pjesën me rezultat 18-14.
Një lojë e mirë e “bardh e kaltërve” të Dritës, vazhdoi edhe në pjesën e dytë me mbrojtje të shkëlqyer të portierit, Arbër Sylejmani dhe me sulm efikas të prirë nga “snajperisti” jo vetëm i Dritës por edhe në Superligën e Kosovës, Gëzim Misini, i cili kësaj radhe shënoi 11 gola. Misinit me të madhe i ndihmoi edhe Rinor Selmani, i cili ndeshjen e mbylli me 7 gola të shënuar.
Me këtë fitore hendbollistët e Dritës renditen në pozitën e tretë me 14 pikë, pozitë e cila i shpie në garat ndërkombëtare, çka njiherit është edhe synim i Dritës.
Pas ndeshjes portieri, Arbër Sylejmani, i cili në këtë takim shkëlqeu theksoi.
“Është një fitore e merituar e skuadrës, dhamë gjithçka nga vetja për të dal fitimtar, kjo fitore është shumë e rëndësishme pasi kjo pozitë na shpije në garat Evropiane”.
Ndërsa golashënuesi dhe “snajperisti” më i mirë i Dritës, Gëzim Misini deklaroi.
“Kemi mposhtur një skuadër e cila ka ambicie të mëdha në këtë stinor, të gjithë hendbollistët dhamë një kontribut të jashtëzakonshëm dhe për këtë fitore jam i lumtur, ndërsa shpresoj se edhe në javët e ardhshme skuadra do të jetë në këtë formë momentale të cilën e kemi”.
Në javën e 11-të hendbollistët e Dritës udhëtojnë në Ferizaj ku do të takohen me Kastriotin./rajonipress/