Drita me autogol mposhtë Malishevën

Në javën e XII-të, në Superligën e Kosovës në futboll, Drita me mund të madh ka arritur ta mposhtë skuadrën e Malishevës me rezultat minimal 1-0.

Futbollistët e Dritës me lojë tejet të dobët gjatë 90 minutave nuk arrinin tek porta e portierit mysafirë Gashi për ta rrezikuar, kryesisht sulmet e skuadrës “bardhekaltër” përfundonin në gjysmë fushën kundërshtare.

Në minutën e 14-të, pas një tollovie të krijuar në zonë futbollisti mysafirë Hoti shënon në portën e tij duke mposhtur portierin Gashi.

Mysafirët në minutën e 26 e 32-të, nëpërmjet Hysenit rrezikojnë por për fat nuk godasin rrjetën, ndërsa Olluri në minutën e 29-të gjuan furishëm por portieri Maloku ja mohon golin.

Drita rast të mirë shënimi kishte në minutën e 75-të, Namani gjuan por topi shkon afër shtyllës. Drita me këtë fitore ka tani 22 pikë, ndërsa në ndeshjen e ardhshme do ta udhëtoj në Suharekë për tu takuar me Ballkanin./rajonipress/