Drita mbijeton barazhin e tretë

Futbollistët e Dritës, mbijetojnë në Superligë pasi ne stadiumin “Riza Lushta” në Mitrovicë, ka mposhtur Dukagjinin me rezultat 2-1.

Në një lojë shumë dramatike skuadra e Dritës me mund të madh ka mbijetuar edhe për një vit ne Superligën e Kosovës në futboll.

Leotrim Kryeziu ishte i pari dhe i vetmi nga skuadra e Dritës, që në pjesën e parë rrezikoj portën e Dukagjinit, por gjuajtjen e tij nga 25 metra e mbron Haxhijaj.

Golin e epërsisë Dukagjini e shënon në minutën e 34-të, Zallaj me një goditje të bukur nga 15 metra mposht portierin e Dritës, Halimin.

Golin e barazimit Drita e shënon në minutën e 64-të, së pari Livoreka harkon bukur tek Zeneli i cili me kokë barazon në 1-1.

Në minutën e 73-të, portieri i Dukagjinit, Visar Haxhijaj përjashtohet nga loja pasi bën ndërhyrje në sulmuesin e Dritës, Alban Shillovën. Në këtë rast gjyqtari i takimit, Fatmir Tahiri, ka mundur të akordon penallti pasi ndërhyrja ishte brenda 16 metërshit, por kështu nuk mendoi ai.

Golin e fitores Drita e arrin në minutat e shtesë, në minutën e 91-të Samir Zeneli harkon më së miri gjendet Alban Shillova, i cili me kokë nga 8 metra gjen rrjetën e Dukagjinit, për t`i siguruar fitore klubit të tij.

Trajneri i Drites, Milaim Zuzaku, pas ndeshjes deklaroi.
“Në asnjë moment nuk kam dyshuar në fitore. Drita në stinorin e ardhshëm do të jetë një skuadër e fuqishme”./rajonipress/