Drita fiton derbin e Anamoravës në hendboll

Gjilan – Befasia ma e madhe e Superligës në hendbollin e Kosovës po vazhdon ende, hendbollistët e Dritës në derbin e Anamoravës kanë mposhtur skuadrën e Zhegrës me rezultat 34-31 (17-11).

Hendbollistët e Dritës në javën e 13-të në Palestrën Sportive “Bashkim Selishta” në praninë e 350 shikuesve demonstruan lojë brilante duke dëshmuar se me hapa gjigant po rikthejnë namin që ka pasur dikur hendbolli Gjilanas duke mposhtur skuadrën e Zhegrës me rezultat 34-31.

Edhe pse ishin temperaturat polare hendbollistët e Dritës në pjesën e parë treguan hendboll cilësor të prirë nga hendbollisti Rinor Selmani i cili në ndeshjen e sotme shënoi 9-të gola.

Në pjesën e dytë hendbollistët e Zhegrës bën përpjekje të anulojnë epërsinë e “bardh e kaltërve” të Dritës por nuk e arritën.

Hendbollisti më i mirë i derbit të Anamoravës Rinor Selmani pas ndeshjes deklaroi.
“Ishte një ndeshje mjaft e fort edhe njëherë treguam se së bashku mund të arrijmë atë që synojmë, jam shumë i lumtur për golat e shënuar ndërsa dëshmuam se me plot meritë jemi në pozitën e dytë”.

Nga 13-të ndeshje skuadra e Dritës ka tubuar 19-të pikë aq sa kanë pozitat e 2, 3 dhe 4.

Në ndeshjen e fundit të stinorit vjeshtor hendbollistët e Dritës do të jenë nikoqirë të Kastriotit të Ferizajit e cila ndeshje do të zhvillohet në fund javën e ardhshme./rajonipress/