Drita e pamposhtur, vazhdon me fitore

Në javën e 9-të, të Albi Superligës së Kosovës në futboll, Drita ka vazhduar formën fantastike duke mposhtur edhe Drenicën me rezultat 2-1.

Në ndeshjen e zhvilluar në Gjilan, tek fusha me bari sintetik, skuadra e Dritës ishte dominuese nga fillimi deri në fund të ndeshjes.

Drita arriti të kaloj në epërsi në minutën e 5-të, golin e shënoi Blend Baftiu, pas një aksioni të mirë nga gjilanasit.

Skuadra e Drenicës arriti që ta barazoj rezultatin në minutën e 43. Koxy realizoi nga penalltia të cilin sipas gjyqtarit Bardh Ajeti, e shkaktoi kapiteni Ardian Limani.

Golin e fitores, “bardhekaltërtit” e Dritës e shënuan në minutën e 87, pas një harkimi të bukur të Besnik Krasniqit, ku më së miri në zonë u gjend Ardit Tahiri, i cili me kokë arriti të shënoj golin e tri pikëve për skuadrën e Dritës.

Me këtë fitore, Drita mbetet lidere në tabelën e klasifikimit me 21 pikë, ndërsa javën e ardhshme do të takohet me Trepçën’89, ndeshje e cila zhvillohet në Gjilan./rajonipress/