Drita befasohet nga Malisheva

Drita ka pësuar humbje si vendase nga Malisheva me rezultat 1:2, në ndeshjen e xhiros së 18-të në Superligën e Kosovës në futboll.

Drita e pësoi disfatën e parë pas tri fitoreve, njëkohësisht ishte edhe humbja e parë për trajnerin Zekirija Ramadani në krye të Dritës.

Drita e kaloi e para në epërsi, në minutën e pestë, më golin që e shënoi Blerim Krasniqi. Malisheva arriti të barazoj rezultatin në minutën e 17-të, golin e realizoi Drilon Hazrollaj.

Ndërsa, golin e fitores për mysafirët e shënoi Altin Aliu në minutën e parë shtesë të pjesës së parë. Drita me këtë humbje mbetet në pozitën e dytë me 31 pike, ndërsa do ta luajë edhe një ndeshje të mbetur me Ballkanin.