Drejtësia, për dikë nënë, për dikë njerkë

Sundimi i ligjit në duart e politikanëve. Parimi i barazisë para ligjit po shkelet

“Nisur nga mbi 70 dosje që i ka vetë Isa Mustafa në prokurori për krim urbanistik në Prishtinë, me të cilat nuk po merret askush, e deri te rasti i djemve të Adem Grabovcit, që rrahën pjesëtarët e Policisë së Kosovës, mund të shohim se sistemi i drejtësisë në Kosovës është komplet në shërbim të interesave personale dhe grupore të njerëzve të pushtetit”, tha Adonis Tahiri nga VV-ja

Drejtësia në Kosovë rrallëherë zbatohet, edhe pse e ka kuptimin e një procesi të zbatimit të ligjeve në mënyrë të barabartë për të gjithë individët, pa dallim race, gjinie, religjioni, apo ndonjë dallimi tjetër specifik.

Aq shumë kritika u thanë për drejtësinë e pasluftës në Kosovë saqë shpesh dëgjuam se kjo drejtësi më shumë sesa që i mbron viktimat ua shkel të drejtat atyre. Njerëz që presin me vite që lënda e tyre të shqyrtohet, njerëz që humbën më të afërmit e tyre dhe nuk u bë asgjë për hetimin e rasteve dhe mbi të gjitha barra kolektive që mbajmë mbi supe: moszbardhja e krimeve të luftës dhe mosndëshkimi i palës serbe, qoftë me një padi të vetme për gjenocid kundër Serbisë. Kështu, duke filluar që nga përditshmëria e një qytetari e deri te problemet më të mëdha shtetërore në çdo sferë gjejmë shembuj të padrejtësive. Neni 3 i Kushtetutës së Kosovës garanton barazinë para ligjit. Këtu Republika e Kosovës është shoqëri shumetnike, e përbërë nga shqiptarët dhe komunitetet e tjera, e cila qeveriset në mënyrë demokratike, me respektim të plotë të sundimit të ligjit, përmes institucioneve të veta legjislative, ekzekutive dhe gjyqësore. Ushtrimi i autoritetit publik në Republikën e Kosovës bazohet në parimet e barazisë para ligjit të të gjithë individëve dhe në respektimin e plotë të të drejtave dhe lirive themelore të njeriut, të pranuara ndërkombëtarisht, si dhe në mbrojtjen e të drejtave dhe në pjesëmarrjen e të gjitha komuniteteve dhe pjesë- tarëve të tyre. Ndërsa, neni 24 e specifikon edhe më mirë barazinë para ligjit. Sipas Kushtetutës, të gjithë janë të barabartë para ligjit. Çdokush gëzon të drejtën e mbrojtjes së barabartë ligjore, pa diskriminim, si dhe askush nuk mund të diskriminohet në bazë të racës, ngjyrës, gjinisë, gjuhës, fesë, mendimeve politike ose të tjera, prejardhjes kombëtare a shoqërore, lidhjes me ndonjë komunitet, pronës, gjendjes ekonomike, sociale, orientimit seksual, lindjes, aftësisë së kufizuar ose ndonjë statusi tjetër personal./kosova sot/