Drejt mbledhjes kombëtare, pa rezultate

Mbledhja e ashtuquajtur historike në mes të qeverisë së Kosovës dhe asaj të Shqipërisë, e mbajtur në janar të këtij viti nuk solli asnjë rezultat në terren. Ndonëse u nënshkruan disa marrëveshje të cilësuara si ‘fort të rëndësishme’ mes dy qeverive, rezultati në praktikë ka mbetur zero. Kësisoj paralajmërimi për një mbledhje të re, po vlerësohet jo i logjikshëm, pa implementimin e marrëveshjeve të mëparshme.

Madje as premtimi ‘simbolik’ i të dy qeverive për ndërtimin një spitali në Luginën e Preshevës, nuk është realizuar. Pavarësisht kësaj, kryeministri i ri i Kosovës, Isa Mustafa gjatë takimit me ambasadorin e Shqipërisë në Prishtinë, Qemal Minxhozi, është zotuar se Qeveria e Kosovës, do të vazhdojë thellimin e bashkëpunimit me qeverinë shqiptare.

Ai ka thënë se po punon që në tremujorin e parë të vitit 2015 Qeveria e Kosovës dhe ajo e Shqipërisë të mbajnë mbledhjen e radhës të përbashkët, praktikë kjo që ka nisur nga qeveria e kaluar. E njohës të çështjeve politike, vlerësojnë se pa implementimin e marrëveshjeve të mëparshme nuk duhet të vazhdohet me takime të tjera(Tribuna).