Dosja “Dikoviq”

Një pjesë e kafkës dhe e këmbës së babait të Rrustem Rukollit, Zymerit, pushon në varrezat e Rezallës. Pjesa tjetër e eshtrave është tretur diku në dheun e Rudnicës në Serbi, atje ku Milicia dhe Ushtria e këtij shteti e kishin dërguar pas vrasjes në vitin 1999. Njeri prej përgjegjësve të qindra vrasjeve, duke e përfshirë edhe vrasjen e Zymerit, ka trazuar shpirtrat e të gjallëve në Drenicë.

Lubisha Dikoviq ka qëndruar këtë javë në Prishtinë. Rrustem Rukollin e ka bërë të qajë kjo vizitë. Tre lot rrëke i rrjedhin atij kur kujton vrasjen e të atit, zhdukjen e trupit, gjetjen e pak kockave dhe rivarrimin e tyre në Rezallë në mesin e 94 viktimave të tjera civile, shkruan sot “Koha Ditore”.

“Ka qenë një lehtësim. Tash të paktën kur vijmë këtu nuk është varri i zbrazët, siç ka qenë përpara. Është një lehtësim, pa dyshim”, thotë Rrustem Rulolli i gjendur mes varresh në Rezallë.

Ai ka varrosur vitin e kaluar pak kocka nga trupi i të atit të gjetur në varrezën masive në Rudnicë të Serbisë. Atje ishte dërguar pasi ishte vrarë bashkë me fqinjët e tij të Rezallës gjatë luftës në Kosovë. Vrasjen e ka kryer brigada e 37-të motorike e udhëhequr nga Lubisha Dikoviq, i cili aktualisht udhëheq Ushtrinë e Serbisë. Përgjegjës për vrasjen dhe zhdukjen e trupave të 250 shqiptarëve është bërë, duke u bazuar në një kallëzim penal të Fondit për të Drejtën Humanitare që udhëhiqet nga Natasha Kandiq.

http://koha.net/?id=27&l=86499