Dorëheqja e Myftiut Saqipi, hapi dyert e unifikimit të spektrit të hoxhallarëve nē Luginë të Preshevës

Sot, ishte një ngjarje e rëndësishme për organizimin fetar në Luginën e Preshevës. Bashkësia Islame për Preshevë, Bujanoc dhe Medvegjë (BIPBM), organizoi kuvendin e saj zgjedhor. Para të pranishmëve, punimet me karakter zgjedhor i hapi kryetari i Kuvendit z. Mevludin Xhelili. Në fillim udhëheqësi i mbledhjes së Kuvendit z. Llukman Limani i përshëndeti delegatët, duke i uruar mirëseardhje delegatëve dhe të pranishmëve.

Kryetari i Kuvendit z. Xhelili verifikoi listën e anëtarëve të Kuvendit. Kuvendi i BIPBM – së numëron 15 anëtarë; gjashtë nga Këshilli i Preshevës, gjashtë nga Këshilli i Bujanocit dhe tre nga Këshilli i Medvegjës.

Pas verifikimit të emrave të kuvendarëve, kryetari i Kuvendit ia kaloi fjalën Myftiut të deritanishëm z. Nexhmedin Saqipit, i cili foli për sfidat që ka kaluar organizimi fetar në Luginën e Preshevës, duke theksuar se BIPBM – ja, ka treguar vizionin e saj, të paraprirë nga zhvillimet të cilat erdhën si rezultat pas pavarësimit të shtetit të Kosovës.

“Qëndrimi i jonë ishte që të respektohet autenticiteti, autoktonia dhe autonomia me specifikat e identitetit, etnik, kulturor e religjioz të shqiptarëve të Luginës së Preshevës. Ideja fillestare ishte që të pengohet implikimi i Novi Pazarit dhe Beogradit në organizimin fetar në Luginë të Preshevës”, theksoi midis tjerash Myftiu Saqipi. Ai, gjithashtu, theksoi se dorëheqjen e tij po e afron me vullnetin dhe dëshirën më të madhe për të dhënë mundësi për gjeneratat e reja dhe për të kontribuar për unifikimin e spektrit të hoxhallarëve nē Luginë të Preshevës. Të gjithë duhet të kujdesemi që të kultivojmë ndjenjën, për paqe, stabilitet, e siguri për të gjithë qytetarët pavarësisht identitetit etnik, religjioz, bindjet politike e ideologjike të qytetarit, u shpreh Nexhmedin Saqipi.

Kuvendi njëzëri pranoi dorëheqjen e Myftiut të deritanishëm z. Nexhmedin Saqipi. Më pastaj kryetari i Kuvendit z. Mevludin Xhelili, propozoi emrin e Mr. Nexhmedin Ademit, kryetar i deritanishëm i Këshillit të Bashkësisë Islame në Preshevë, për Myfti të BIPBM- së.

Delegatët e Kuvendit njëzëri votuan për kandidaturën e propozuar për Myfti të BIPBM- së z. mr. Nexhmedin Ademit.

Myftiu i sapo emëruar falënderoi z. Nexhmedin Saqipin për kontributin e tij në krijimin e stabilitetit institucional gjatë mandatit të tij në krye të BIPBM- së. Në fjalën e tij përmendi edhe rëndësinë e mbështetjes që i ka dhënë Bashkësia Islame të Kosovës kësaj iniciative. Ai, gjithashtu, ftoi për mobilizim që të mendojmë më shumë se çfarë po bëjmë ne për institucionin, e jo çfarë po bënë institucioni për neve.

Duke falënderoi delegatët për mbështetjen e dhënë, Mr. Nexhmedin Ademit, kryetar i sapozgjedhur në krye të BIPBM- së, kërkoi që në të ardhmen institucioni të shërbej për mundësi dhe ide e të gjithë njerëzve të vullnetit të mirë për ta avancuar jetën institucionale në shërbim të ruajtjes së vlerave fetare dhe kombëtarë në Luginë të Preshevës. Kuvendi punimet i zhvilloi në restorantin Dyseldorf në Bujanoc. Me këtë rast pronari i restorantit ndihmoi, duke shtruar një drekë për të pranishmit, njofton Jetapress.