Donis Avdijaj i kthehet shkëlqimit

Donis Avdijaj po bind gjithnjë e më shumë për cilësitë e tij dhe fundjavën e shkuar dhuroi spektakël në Bundesligën austriake, duke ndihmuar Sturm Grazin të fitonte 3-1 në Grodig.

Talenti 19-vjeçar, kartoni i të cilit i përket Schalkes, shënoi një gol dhe dha dy asiste, duke qenë vendimtar dhe duke merituar edhe përfshirjen në formacionin më të mirë të javës në Bundesligën austriake.

Plot pesë lojtarë të Sturmit janë përfshirë në formacionin e javës, me Avdijaj që është vlerësuar me notën 8, duke qenë lojtari i tretë me notën më të lartë të javës.

Këtë sezon Avdijaj ka shënuar tre gola në kampionat, në 18 ndeshje, por prej tetorit deri në janar ka qenë i dëmtuar, ndërsa duket se ka rigjetur formën ideale.

Duhet kujtuar se Avdijaj para pak ditësh konfirmoi se do të luajë vetëm për kombëtaren shqiptare, nëse trajneri De Biasi e ka në planet e tij./telegrafi/