Doktoresha e PDK-së nuk i frikësohet ri-kandidimit

Gjilan – Salihe Mustafa ish deputete në Parlamentin e Republikës së Kosovës (2011-2014) dhe anëtare e komisionit për shëndetësi, punë dhe mirëqenie sociale është kandiduar sërish për postin e deputetit me arsyetimin se ajo ka punuar me efikasitet dhe ka qenë në shërbim të qytetarëve. Besoj se nuk i kam zhgënjyer votuesit e mi dhe qytetarët e shumtë të Gjilanit e Anamoravës. Isha zëri i qytetarëve dhe kështu do të jetë edhe në të ardhmen shprehet ajo.

Salihe Mustafa me profesion stomatologe ka hyrë në politikë fillimisht si këshilltare komunale në vitet 2002-2006 nga radhët e PDK-së për të qenë pastaj edhe në postin e nënkryetares së PDK-së në vitin 2005-2013, raporton rajonipress.

Ajo me këtë bagazh edhe u kandidua për deputete në periudhën 2011-2014 ku edhe u zgjodh deputete e Parlamentit të Kosovës. Duke e parë punën e saj afirmative PDK vendosi që sërish ta kandidojë Salihe Mustafën.

Ajo tani ndihet e relaksuar që edhe në këtë mandat të dal faqebardhë para votuesve të saj dhe para elektoratit gjilanas. “Mendoj se puna ime ka qenë tepër transparente dhe e dobishme për rajonin e Anamoravës. Në të gjitha takimet e mija zyrtare jam munduar që të avancojë shëndetësinë gjilanase, jam përpjekur që në të gjitha rrethanat përfitues të jenë pikërisht qytetarët e Gjilanit” tha Mustafa për rajonipress.

Salihe Mustafa e dinë mirë nevojën që ka shëndetësia gjilanase pasiqë ajo që nga viti 1987 ka punuar në Qendrën Kryesore të Mjekësisë Familjare në Gjilan, kurse në periudhën 2001-2004 ishte udhëheqëse e shërbimit Stomatologjik. Nga viti 2008 deri në vitin 2011 shërbeu si drejtoreshë e Qendrës Kryesore të Mjekësisë Familjare në Gjilan.

Mustafa meqë ka qenë pjesë e komisionit për shëndetësi në Parlamentin e Kosovës thotë se në këtë komision ishte e angazhuar në amandamentimin dhe miratimin e disa ligjeve shumë të rëndësishme si: Ligji për Dëshmorët dhe Invalidët e Luftës, Ligji për veteranët e UÇK, ligji i shëndetësisë, ligji i odave të profesionistëve shëndetësor, ligji i sigurimeve shëndetësore, ligji për pajisje dhe produkte medicinale.

Salihe Mustafa është e bindur se puna e saj dhe përkushtimi i saj do të gjejnë mbështetje sërish tek votuesit e saj të sinqertë. “Unë besimin e tyre e kam treguar me punë dhe angazhim. Do të mbetem sërish e njëjta që të punojë e angazhohem për të qenë pjesë e zhvillimeve pozitive në mbarë Anamoravën” tha Mustafa.

Duke pasur një përvojë në fushatat zgjedhore, Salihe Mustafa thotë se kësaj radhe PDK do të fitojë më shumë ulëse në Parlamentin e Kosovës.”Tashmë qytetarët e kanë kuptuar se forca e PDK-së dhe fuqia e saj në Parlament e Qeveri është në interes të vendit sepse stabiliteti i PDK-së është stabilitet dhe garanci për Kosovën” shprehet Mustafa./rajonipress/