Dogana e ATK-ja mblodhën 946 milionë euro

Dogana e Kosovës dhe Administrata Tatimore e Kosovës (ATK) gjatë periudhës janar-tetor të këtij viti kanë arritur t’i mbledhin rreth 946 milionë euro. Të dy institucionet që e mbushin arkën e shtetit i kanë kaluar parashikimet e mbledhjes së të hyrave.

Zëdhënësi i Doganës, Adriatik Stavileci ka bërë me dije se të hyrat doganore për periudhën janar-tetor gjatë këtij viti janë 684.3 milionë euro, apo 2 për qind më të larta në krahasim me të njëjtën periudhë të vjetme.

“Të hyrat doganore në pikat kufitare kanë pasur një trend të rritjes progresive në krahasim me vitin e kaluar, por nuk ka qenë shumë e lartë”, është shprehur Stavileci, për Epoka e re.

ATK-ja, ndërkaq, në periudhën janar-tetor 2013 ka realizuar të hyra në vlerë prej 261.7 milionë euro. Blerta Nikqi, zyrtare për komunikim në ATK, ka bërë me dije se krahasuar me periudhën janar-tetor të vitit të kaluar, të hyrat e ATK-së në këtë periudhë janë më të mëdha për 25.9 milionë euro apo për 11 për qind.

Stavileci ka bërë me dije se pas rikthimit në pikat doganore 1 dhe 31, nuk është vërejtur ndonjë rast i madh ië kontrabandimit të mallrave.

“Ka raste që tanimë janë sporadike, kryesisht nëpërmjet rrugëve sekondare. Dogana e Kosovës vetëm gjatë këtij viti, në krahasim me vitin e kaluar, ka rritur të hyrat e përgjithshme për afër 2 për qind, pra kjo nuk do të ishte e mundur nëse kontrabanda do të rritej.

Nga kjo është e qartë se trendi i kontrabandimit është zvogëluar”, ka deklaruar Stavileci. /Telegrafi/