Gjilan – Të enjten, në “Parkun e Dëshmorëve”, të fshatit Dobërçan u organizua “Darka për Mërgimtarët”, e cila tashmë është bërë tradicionale. Ky organizim po bëhet për të nderuar dhe respektuar bashkatdhetarët tanë të cilët jetojnë dhe punojnë në Diasporë, por që një pjesë të djersës dhe mundit të tyre e harxhojnë për të mirën e fshatit, duke i dhënë epitetin “fshati zviceran”.
Mërgimtarët e Dobërçanit gjithmonë kanë dhënë kontribut të madh për vendlindjen, por posaçërisht nga viti 2009 ata janë organizuar nëpërmjet shoqatës 17shkurti.ch, motoja e së cilës është “Së bashku për fshatin”.
Andaj, në shenjë mirënjohje dhe falënderimi, një grup i të rinjëve të fshatit organizuan edhe në këtë vit “Darkën për Mërgimtarët” me ushqime tradicionale të cilat ishin kontribut i familjeve të fshatit. Ndërsa, pas darkës të pranishmit vazhduan të argëtohen me muzikë e valle popullore shqipe.
Qëllimi i këtyre organizimeve është që të takohemi së bashku e t’i forcojmë lidhjet ndërmjet vete, ndërsa gjeneratave të reja që jetojnë në mërgim, t’ua shtojmë dëshirën dhe vullnetin që pushimet e tyre gjithmonë t’i kalojnë në Dobërçan.
Në emër të organizatorëve, falënderojmë të gjithë mërgimtarët që ishin prezent, si dhe të gjitha ato familje të cilat kanë përgatitur ushqime tradicionale dhe ata të cilët u kujdesën për mbarëvajtjen e këtij organizimi duke dhënë kontribut në forma të ndryshme.
Mirë u takofshim në organizime të tjera./rexhep arifi/rajonipress/
