Distria Krasniqi fiton medalje evropiane

Distria Krasniqi ka arritur në finale të Kampionatit Evropian të grupmoshës U-21, i cili po mbahet në Podgoricë, raporton “Zëri”.

Xhiron e parë Distria e ka kaluar pa luftë. Kurse, në rrethin e dytë reprezentuesja kosovare e ka mposhtur izraeliten, Betina Temelkova.

Ndërsa, në betejën për kualifikim në gjysmëfinale Krasniqi e ka mundur rusen Daria Bobrikova. Në gjysmëfinale Distria mposhti italianen Francesca Giorda, shkruan “Zëri”. Në finale për medaljen e artë kosovarja ndeshet me Alexandra-Larisa Florian nga Rumania. Edhe nëse nuk e fiton të artën, medaljen e argjendtë tashmë e ka siguruar si finaliste.

Në këtë Evropian po marrin pjesë edhe Laura Fazliu, Loriana Kuka dhe Akil Gjakova. Deri më tani janë eliminuar Leutrime Krasniqi dhe Flaka Loxha, të cilat kanë humbur në xhiron e dytë. /Zëri/