Diskutohet për menaxhim të situatave dhe mbrojtje të fëmijëve

Viti – Është mbajtur sot në Viti punëtoria për themelimin e tryezës së rrumbullakët për menaxhim të rasteve, që ka për qëllim mbrojtjen e fëmijëve përmes Indikatorëve Universal të Mirëqenies, sigurisë, shëndetit, arritjes e edukimit, familjes.

Këtij mekanizimi do t`i paraprijë një marrëveshje mirëkuptimi mes komunës së Vitisë dhe “Terre des homes” përfaqësia në Kosovë, i cili bashkëpunim ka për qëllim ngritjen e nivelit të mbrojtjes së fëmijëve dhe të drejtave të tyre duke siguruar bashkëpunimin dhe koordinimin ndër institucional dhe profesionistëve përgjegjës.

Zv.kryetari i komunës së Vitisë Hasan Aliu në fillim të kësaj punëtorie ka theksuar rendësin e themelimit të këtij grupi punues që do të merret me menaxhimin e rasteve. “Ne jemi mirënjohës përfaqësuesve të kësaj organizate që ka planifikuar shtrirjen e aktivitetit edhe në komunën e Vitisë dhe të jemi komuna e 14 që themelon këtë mekanizëm. Fëmijët që kanë nevoje për përkujdesje, duhet të mbështeten dhe kjo formë është adekuate që të jetë sa më afër tyre”, ka thënë Aliu.

Ndërsa për aktivitetin e “Terre des homes”, foli Naim Bilalli koordinator për menaxhim e rasteve për të drejtat e fëmijëve, i cili theksoi se fokusi është fëmija dhe si tryezë ka mandatin që të merret me të drejtat e fëmijëve. “Qendra për Punë Sociale është shtylla e menaxhimit të rasteve. Kriteret e rrezikut të mesëm apo të lartë janë përcaktuar bazuar në vlerësimin e detajizuar dhe kombinuar të tri faktorëve të situatës së fëmijës, rreziqet, cenueshmëria dhe faktorët mbrojtës.

Bilalli ka folur për fushë veprimtarin që do ta ketë tryeza për menaxhimin e rasteve, duke përmendur edhe ofrimin e përkujdesjes për fëmijët pa përkujdesje prindërore, disa forma të mbrojtjes, bënë analiza sociale për rastet e referuara, mbrojtjen e fëmijëve me nevoja të veçanta, nga dhuna në familje, rasteve të trafikimit dhe mbrojtjen e të miturve me sjellje asociale, etj.

Në punëtorin e organizuar nga Zyra e kryetarit të komunës në bashkëpunim me përfaqësuesit e organizatës “Terre des homes”, morën pjesë zyrtarë të Qendrës për Punë Sociale, drejtorisë për mirëqenie sociale, Shtëpisë së Shëndetit, Çerdhes së fëmijëve etj./rajonipress/