Diskursi përçarës politik

Nga Ardian Haziri – Diskursi përçarës politik nuk është thjesht një stil i komunikimit publik, por një faktor me ndikim të drejtpërdrejtë në strukturën shoqërore. Kur gjuha politike mbështetet mbi kundërshti të ashpra, etiketime, shpifje dhe retorikë denigruese, ajo gradualisht e helmon klimën politike dhe shoqërore, duke e zhvendosur debatin nga përmbajtja te konfliktualiteti.

Gjuha e urrejtjes dhe përçarja e artikuluar nga përfaqësues të partive politike krijojnë pasoja që tejkalojnë hapësirën e politikës. Kur debati zëvendësohet me linçime dhe akuza të pabazuara, efekti i drejtpërdrejtë reflektohet te një numër i madh i qytetarëve, duke thelluar ndasitë, duke rritur intolerancën dhe duke dobësuar besimin shoqëror e institucional.

Në këtë klimë, demokracia nuk forcohet, por dëmtohet. Ajo nuk mund të mbështetet mbi armiqësi politike, por mbi kulturë komunikimi, respekt për mendimin ndryshe dhe përballje idesh përmes argumenteve.

Prandaj, përgjegjësia publike e secilit përfaqësues politik duhet të nisë nga gjuha që përdor dhe shembulli që jep para qytetarëve, sepse fjala politike ka fuqi formësuese mbi realitetin shoqëror.

Në këtë kontekst, diskursi politik duhet të kalojë nga përçarja në përgjegjësi, nga retorika e konfliktit në atë të argumentit dhe nga manipulimi emocional në komunikim të bazuar në fakte e transparencë.

Në anën tjetër, një diskurs politik i matur dhe i përgjegjshëm është garanci për stabilitet shoqëror dhe funksionim demokratik. Ai nxit kulturën e debatit, forcon institucionet dhe krijon hapësirë për pluralizëm të shëndetshëm.

Suksesi i një demokracie varet edhe nga cilësia e përfaqësuesve të saj. Prandaj, suksese kandidatëve meritorë dhe të dëshmuar për deputetë, atyre që me punë, integritet dhe përgjegjësi qytetare synojnë të përfaqësojnë denjësisht interesin e qytetarëve dhe të kontribuojnë në forcimin e demokracisë dhe dinjitetit të jetës publike./rajonipress/