Disa ushqime ndikojnë në disponimin tuaj

Studimet dhe përvoja tregojnë, pa asnjë dyshim, se ushqimi ndikon në mënyrën si ndjehemi. Disa fëmijë janë më të prirë të ndikohen në gjendjen e tyre shpirtërore nga ushqime të caktuara sesa disa të tjerë.

Ja disa nga lidhjet ushqim – humor:

Karbohidratet që qetësojnë: fasulet, frutat dhe drithërat integrale janë sheqerna që na relaksojnë, pasi nuk shkaktojnë luhatje drastike të sheqerit.

Karbohidrate që na acarojnë: ëmbëlsirat e pasura në sheqer të bardhë, krem pastiçerie, miell të bardhë dhe yndyra të tipit margarinë shkaktojnë shpesh luhatje të humorit siç shkaktojnë luhatje të sheqerit në gjak.

Ushqimet e inteligjencës: Fëmijët që kanë mungesë hekuri sidomos në 2 vitet e para të jetës janë të prirë të kenë IQ më të ulët. Hekuri i ulët në gjak lidhet drejtpërdrejtë me ulje të kthjelltësisë së mendjes dhe me gjendje të irrituar të fëmijës.

Është parë se me korrigjimin e nivelit të hekurit në gjak vjen përqendrim më i mirë dhe performancë më e kënaqshme në mësime.

Mishi i viçit, gjethet e panxharit, patatet e vogla me lëkurën e tyre, stafidhet dhe thjerrëzat janë burim i mirë i hekurit.

Ushqimet e “gëzimit”: shumë nga ne ndihen mirë pas konsumit të një çokollate, një gote qumësht, një bananeje apo dhe gjetheve jeshile si rukola, spinaqi etj, pasi ato shkaktojnë çlirimin e neurotrensmetuesve si dopamina, serotonina që lidhen me gjendje të pëlqyeshme të humorit.

Ushqimet e “mërzisë”: Disa persona ndjehen të trishtuar pas konsumit të një ushqimi shumë të yndyrshëm ose shumë të sheqerosur.

Fëmijë të ndryshëm kanë reagime të ndryshme. Prindërit duhet të marrin rolin e dedektivit për fëmijët e tyre për të konstatuar ushqimet që e ndihmojnë atë të ndjehet mirë dhe I aftë të përqendrohet e të mësojë.