Diplomati amerikan: Kosova dhe Serbia do të fitojnë nga bisedimet!

Ambasadori i Shteteve të Bashkuara të Amerikës në Serbi, Michael Kirby në një intervistë për gazetën beogradase “Danas”, ka deklaruar se Kosova dhe Serbia do të jenë dy shtetet që do të dalin fituese në bisedimet që po zhvillohen në Bruksel.

Sipas tij, Qeveria e Aleksandër Vuçiqit është shprehur e interesuar dhe angazhuar që të ketë dialog me Republikën e Kosovës, transmeton “Zeri.info”

“Gjithmonë ka shumë arsye që të mos bisedohet më dikë. Por nevojitet shumë guxim dhe lidership për të biseduar me njerëzit me të cilët nuk jeni dakord. Por mua më duket se kjo qeveri është e angazhuar që të ketë përparim. Përkundër problemeve në Kosovë, një raund i ri i dialogut po zhvillohet në Bruksel. Unë mendoj se është më mirë për të gjithë qytetarët që të vazhdojë dialogu. Shpesh mendohet, “në qoftë se ata fitojnë, ne kemi për të humbur”. Ne amerikanët, besojmë se të dyja palët në një mosmarrëveshje mund të dalin fitues. Unë mendoj se është në këtë rast kjo është e mundur”, është shprehur ai.

Më tej, diplomati amerikan thotë se Serbinë e ka konsideruar gjithmonë si një vend evropian. Marrëdhëniet me fqinjët, sipas Kirbyt, janë shumë pozitive për zhvillimin e vendit.