Dikur refuzonin, tani kërkojnë të integrohen në Policinë e Kosovës

Ish-punëtorët e Drejtorisë së Policisë së Mitrovicës të MUP-it serb, të cilët kanë ndërprerë punën pas Marrëveshjes së Brukselit për Policinë, kanë kërkuar të takohen me kryeministrin e Serbisë, Aleksandër Vuçiq, për t’i treguar atij të gjitha problemet me të cilat janë duke u përballur, ndërsa për javën e ardhshme kanë paralajmëruar protesta.

Siç kanë thënë përfaqësuesit e tyre në një konferencë me gazetarë, ata do të kërkojnë nga Vuçiqi që t’i integrojë në Policinë e Kosovës, ndonëse ata vetë kishin refuzuar të integrohen.

Në konferencën e organizuar me gazetarë, para zyrës së dikurshme të tyre në veri të Mitrovicës, ata kanë deklaruar se nuk kanë marrë asnjë përgjigje në kërkesat që ia kanë drejtuar MUP-it të Serbisë, Zyrës për Kosovën, si dhe Policisë së Kosovës dhe EULEX-it, në fund të shkurtit, kur kishin protestuar në veri./zeri/