Diaspora përmirësoi klimën e bizneseve

“Sidomos tremujori i fundit ka qenë shumë i kënaqshëm te tregtia me shumicë dhe kjo gjithmonë duke pas parasysh që kemi një aktivitet të shtuar të diasporës”.

Gjatë tremujorit të fundit është vlerësuar një përmirësim i dukshëm i klimës së të bërit biznes në Kosovë, konsideron Oda Ekonomike e Kosovës (OEK). Sipas komunitetit të biznesit, këtë klimë e kanë përmirësuar bashkatdhetarët me remitencat e tyre.

Rreth 83 për qind e kompanive të anketuara kanë deklaruar se situata për të bërë biznes është e kënaqshme. Këto konstatime OEK i ka nxjerr në bazë të një ankete lidhur me sektorin e shitjes, me kompanitë e ndërtimi dhe kompani të tjera prodhuese në Kosovë.

Sipas rezultateve të anketës, vetëm 17 për qind e bizneseve të anketuara janë deklaruar se situata e tyre në biznes nuk është kënaqshme.

Bengjet Rukiqi është sekretari i Odës Ekonomike të Kosovës. Ai tha se në krahasim me tremujorin e parë dhe atë të dytë të këtij viti, tremujori i tretë ka treguar një rimëkëmbje ekonomike në vend.

“Me ambientin që ekziston në kushtet e veprimit të tyre, gjendja është e kënaqshme. Sidomos tremujori i fundi ka qenë shumë i kënaqshëm te tregtia me shumicë dhe kjo gjithmonë duke pas parasysh që kemi një aktivitet të shtuar të diasporës”, deklaroi ai.

Sidomos vera e këtij viti, sipas tij, ka qenë me një ardhje të madhe të remitencave, raporton REL.

Në anketën që ka bërë Oda Ekonomike e Kosovës me drejtuesit e 498 kompanive, thuhet se pritjet e biznesit për gjashtëmujorin e ardhshëm, janë më pak të larta se në gjysmën e parë të këtij viti. Kështu, rezultatet japin sinjale se rimëkëmbja ekonomike do të vazhdojë edhe vitin tjerët.

Rukiqi nga OEK-u, tha se rreth 75% e bizneseve presin që punësimi i tyre të mbetet i njëjtë gjatë tre muajve të ardhshëm dhe nuk presin ndryshime sa i takon çështjes së vendeve të reja të punës.

“Problemi qëndron për pritjet përgjatë muajve të ardhshëm. Nuk kemi tendencë të kompanive t’i zvogëlojnë vendet e punës apo të largojnë punëtorë nga puna. Po në të njëjtën kohë nuk e paraqesin asnjë ndonjë tendencë të krijimit të vendeve të reja të punës”, shpjegoi Rukiqi.

Duke komentuar të gjeturat e këtij studimi të Odës Ekonomike të Kosovës, eksperti i ekonomisë, Ibrahim Rexhepi, tha se me gjithë përmirësimet, sipas anketës, nuk po vërehen ndryshime në gjendjen e përgjithshme sociale në vend.

“Për mua është pak shqetësuese kjo meqenëse kjo situatë e kënaqshme nuk ka një impakt të përgjithshme social. Do të thotë bizneset janë në pozitë më të mirë po kjo mund të jetë e mirë vetëm për pozicionin e tyre, por jo edhe për përfituesit e tjerë”, vlerësoi Rexhepi.

Hulumtimi tregon se përmirësime të dukshme janë vërejtur posaçërisht në sektorin e ndërtimtarisë, por edhe për tregtinë me shumicë, ndërsa pritjet për të ardhmen janë më pak optimiste në krahasim me tremujorët e kaluar.