Dialog në vend të seancave, opozita gati për protesta

Kryesia e Kuvendit duket se është bindur të mos thërrasë më seanca plenare, ku pikë e vetme e rendit të ditës është hedhja e gazit lotsjellës, shkruan sot Koha Ditore.

Gazeta merr vesh se për t’i hapur rrugë dialogut me ndërmjetësimin e presidentes dhe me qëllim të shmangies së skenarëve nga seancat e kaluara të cilat u ndërprenë pasi opozita futi gaz lotsjellës, Kryesia e Kuvendit do ta shqyrtojë mundësinë e mosthirrjes së seancave plenare për një periudhë të caktuar.

Ndërkohë që janë rritur zërat, të cilët kërkojnë nevojën e dialogut ndërpartiak për tejkalimin e tensioneve ndërmjet Qeverisë dhe opozitës, presidentja Atifete Jahjaga ka shprehur gatishmërinë që brenda mandatit të vet kushtetues të ndihmojë në shtensionimin e situatës.

Por, opozita refuzon çdo dialog, përderisa nuk ka tërheqje të nënshkrimit të kryeministrit Isa Mustafa nga marrëveshjet e fundit. Me 200 mijë nënshkrimet në peticionin kundër Marrëveshjes për Asociacionin dhe demarkacionit me Malin e Zi, opozita ka kthyer sytë nga protestat “gjithëpopullore”.

Protestat në rrugë dhe bllokadën në Kuvend opozitarët janë të vendosur të mos i ndalin deri në realizmin e kërkesave ose dorëheqjen e kryeministrit Mustafa.

http://koha.net/?id=27&l=80079