I njohur si simbol i rezistencës, veprimtari dhe shkrimtari Adem Demaçi ka një dhuratë për 100-vjetorin e Pavarësisë së Shqipërisë. Qeveria e Kosovës ia ka ndarë atij 40 mijë euro honorar. Plus 50 mijë euro të tjera të shtetit janë ndarë për botimin e 6 mijë kompleteve të veprave të tij, të cilat tashmë kanë filluar të shpërndahen.
Qeveria e Kosovës, përmes dy vendimeve – një më 12 shtator e tjetri më 21 nëntor të këtij viti – ka ndarë 90 mijë euro për botimin e kompletit të veprave të Demaçit.
Me kërkesën e parë ishin miratuar 30 mijë euro, të cilat i ka dhënë Ministria e Kulturës, e me të dytën, edhe 60 mijë të tjera, që janë ndarë nga Zyra e kryeministrit dhe Ministria e Arsimit, shkruan Koha Ditore, transmeton telegrafi.
Një kërkesë për botimin e veprave të Demaçit ishte bërë nga Lidhja Shkrimtare e Kosovës, kryetar i së cilës është vetë Demaçi.
Kërkesa e Lidhjes së Shkrimtarëve të Kosovës – e vulosur më 7 tetor dhe e protokolluar tri ditë më vonë – që i është drejtuar kryeministrit të vendit, Hashim Thaçi dhe zëvendësit të tij, Hajredin Kuçi – specifikon se ky projekt parasheh botimin e 6 mijë kompleteve të veprave të Demaçit. Botimi, sipas kësaj kërkese, do të ketë logon e LSHK-së.
