Dhunë pas ndeshjes

Gjilan – Tre persona janë lënduar pasi “tifozët” e ekipit të futbollit Drita të Gjilanit kanë sulmuar tifozët e Llamkosit të Vushtrrisë. Tifozët gjilanas, të revoltuar nga humbja katastrofale dhe fare e papritur me rezultatin 4:0, kanë sulmuar dy autobusë që bartnin tifozët e ekipit vushtrrias. Si raporton KTV-ja, ngjarja ka ndodhur në dalje të Gjilanit, kur ekipi vushtrrias po largohej në drejtim të Prishtinës. Ata janë sulmuar me gurë e gjësende të tjera, ndërsa janë dëgjuar edhe të shtëna armësh.

Ismet Hashani, nga Polica rajonale e Gjilanit, ka konfirmuar rastin. “Ka ndodhur një incident në mes të tifozëve të Dritës së Gjilanit dhe Llamkosit të Vushtrrisë, ku përveç dëmeve materiale, ka pasur edhe të lënduar. Në mesin e të lënduarve ka edhe pjesëtarë të Policisë”, ka thënë Hashani.

Prej afro 50 tifozëve që kanë sulmuar, policia ka arritur që vetëm dy prej tyre t’i arrestojë.

Kjo nuk është hera e parë që tifozët e Dritës sulmojnë kundërshtarët e tyre apo edhe arbitrit në rastet kur ekipi i tyre pëson disfatë.