Dhimbja e shpinës është një problem që prek një numër të madh njerëzish

Dhimbja e shpinës është një problem i zakonshëm që prek një numër të madh njerëzish në mbarë botën, veçanërisht në pjesën e poshtme të saj. Shkaktarët mund të jenë të ndryshëm, por shpesh, qëndrimi i keq gjatë ditës apo gjatë gjumit e përkeqëson këtë gjendje.

Sipas ekspertëve shëndetësorë britanikë, mënyra më e mirë për të fjetur nëse keni dhimbje shpine, apo për ta parandaluar atë, është të flini në shpinë. Kjo pozitë ndihmon në shpërndarjen e barabartë të peshës trupore dhe mban shtyllën kurrizore në një vijë të drejtë, duke e reduktuar presionin në zonën e mesit.

Për të përfituar sa më shumë nga kjo pozitë, rekomandohet:

Të shtriheni në shpinë;
Të vendosni një jastëk të sheshtë nën gjunjë për të mbajtur lakimin natyral të shtyllës;
Nëse krijohet një boshllëk poshtë mesit, të vendosni një peshqir të mbështjellë për mbështetje shtesë.
Nga ana tjetër, ekspertët paralajmërojnë se fjetja në bark është pozita më e keqe për shpinën, pasi nuk ofron mbështetje dhe shkakton stres në qafë.

Zbatimi i këtyre këshillave mund të ndihmojë në lehtësimin e dhimbjeve dhe përmirësimin e cilësisë së gjumit për ata që vuajnë nga problemet me shpinën.