Dëshmoi e veja e Agim Zogajt, akuzon prokurorin Salustro për presion

Ka vazhduar rigjykimi ndaj Fatmir Limajt dhe të tjerëve në rastin e njohur si “Kleçka”. Publiku dhe gazetarët janë përjashtuar nga seanca e sotme me kërkesë të dëshmitares Y. Megjithëse e mbrojtur, gjatë dëshmisë është kuptuar se rrëfimin e ka dhënë e veja e Agim Zogajt, transmeton KTV.

Në fazën e hetimeve kur ajo kishte dhënë dëshmi para EULEX-it kishte thënë se bashkëshorti i saj e kishte paralajmëruar se në rast se i ndodh diçka, t’i dorëzonte ditarët e tij.

Por, të paktën sipas mbrojtjes, ajo të martën ka demantuar gjithçka. Madje, ka akuzuar prokurorin Mauritzo Salustro për presion.

Mbrojtja dëshminë e saj e konsideron si të favorshme për të. Ajo do të vazhdojë dëshminë edhe të enjten në rastin për krime lufte ndaj Fatmir Limajt dhe 9 ish-ushtarëve të UÇK-së. /Indeksonline/