Dëshira për bashkim me Kosovën dhe frika nga ndarja e Luginës

Përfaqësues politikë të shqiptarëve në Luginë të Preshevës thonë se ëndrra e tyre është bashkimi me Kosovën, por të mos ndodhë bashkimi i pjesshëm vetëm i Preshevës pa Bujanocin dhe pa Medvegjën, shkruan sot Gazeta “Zëri”.

Zyrtarë të Presidencës së Kosovës kanë konfirmuar se në takimin e radhës, i cili do të zhvillohet në Bruksel me palën serbe në kuadër të fazës finale të dialogut, do të diskutohet edhe kërkesa e shqiptarëve të Luginës së Preshevës për bashkim me Kosovën.

Madje presidenti Hashim Thaçi në një postim në profilin e tij në rrjetin social “Facebook” ka shkruar se edhe ish-presidenti Ibrahim Rugova kishte qenë pro shkëmbimit të territoreve.

“Jo ndarje të Kosovës, por po shkëmbimit të territoreve’, ky ishte qëndrimi realist dhe i guximshëm i presidentit Ibrahim Rugova në vitin 1994. Ndërsa qëndrimi im sot si president i Republikës së Kosovës ka evoluar dhe është i qartë: jo ndarje, jo shkëmbim, po korrigjimit të kufirit ndërmjet Kosovës dhe Serbisë për të mundësuar bashkëngjitjen e Preshevës, të Bujanocit dhe të Medvegjës me Kosovën”, ka shkruar Thaçi në “Facebook”.