Deputetja e LDK-së: Mafia e energjisë po e vret ekonominë e Kosovës

Deputetja e Lidhjes Demokratike të Kosovës (LDK), Jehona Lushaku, ka reaguar ashpër ndaj situatës aktuale në sektorin energjetik, duke akuzuar qeverinë Kurti për favorizim të interesave të ngushta dhe dështim në mbështetjen e prodhuesve vendorë.

“Kosova është shndërruar në një shtet ku qytetari paguan më shumë, jeton më keq dhe rrezikon të mbetet pa punë. Vendi ku biznesi nuk guxon të ëndërrojë sukses, sepse pushteti ia mbyll rrugën”, shkroi deputetja.

Ajo akuzoi ashpër të ashtuquajturën “mafia e energjisë”, duke pretenduar se prodhuesit po detyrohen të blejnë energji nga kompani që kanë lidhje të drejtpërdrejta me zyrtarë qeveritarë.

Sipas Lushakut, kjo situatë është pasojë direkte e politikave të kryeministrit Albin Kurti, të cilin ajo e akuzon për “urrejtje ndaj sektorit privat dhe varfërim të popullit”.“Kurti në opozitë ‘për prodhime vendore’, Kurti në pushtet ‘për mbytjen e tyre’,” përfundon reagimin e saj deputetja e LDK-së.