Dënohet kosovari, mashtron me 190.000 franga pensionisten zvicerane

Trupi gjykues në Gjykatën e Krimeve në Lucern, e ka dënuar 55 vjeçarin me burg 15 muaj me kusht, në një kohë provuese prej dy vitesh.

Një zvicerane 75 vjeçare i ka dhënë shqiptarit 55 vjeçar nga Kosova, rreth 190.000 franga. Të gjitha këto ia kishte huazuar «dashnorit» të saj 20 vjet më të rinj për t`i ndihmuar në tejkalimin e «problemeve të tij shëndetësore» dhe për ta ndihmuar në planet e tij për të blerë patundshmëri në Kosovë.

Ai, gjithsesi, i ka premtuar se do t`ia kthente paratë dhe do t`i kushtonte më tepër kujdes asaj në të ardhmen, shkruan, zentralplus.ch Por ai ka mbajtur fshehur para saj faktin se ai është i martuar, i papunë dhe kam mbi kokë mbi gjysmë milioni franga borxh.

Trupi gjykues në Gjykatën e Krimeve në Lucern, e ka dënuar 55 vjeçarin me burg 15 muaj me kusht, në një kohë provuese prej dy vitesh, transmeton albinfo.ch. Këtë dënim e ka marrë për disa akte abuzimi të besimit, pasi që është konstatuar se ai edhe më parë ka bërë disa mashtrime me kartela bankash. Por, kosovari është shpallur i pafajshëm sa i përket akuzës për mashtrim të shumëfishtë, kështu që dënimi ka rezultuar më i butë se sa ishte kërkuar nga akuza. Moralisht kjo çfarë ka bërë ai mund te jetë problematike por nuk mund të sanksionohet si mashtrim në kuptimin juridik.

Ai e kishte mashtruar pensionisten zvicerane duke i thënë se në Kosovë do të blente patundshmëri me çmime të volitshme, të cilat pastaj do t`i shiste më shtrenjt. Në këtë mënyrë ai përveç që do t`i zgjidhte problemet e tij financiare do të arrinte që në një kohë të shkurtë t`ia kthente asaj paratë e huazuara, përcjell albinfo.ch. Por, në vend të të gjitha këtyre, ai i çonte paratë nëpër kazino dhe e shtonte jetën me paratë e plakës. Kosovari, tashmë ia kishte pranuar asaj para gjyqit se ia kishte borxh 140 mijë franga të cilat ishte zotuar t`ia kthente. Po ashtu edhe shpenzimet procedurale prej 4000 frangash duhet t`i paguante ai.

Ndërsa sa u përket 50 mijë frangave të mbetura, e dëmtuara mund të iniciojë një procedurë civile për t`i siguruar ato. Por në fakt është pikëpyetje e madhe se do t`i shohë ato para pasi që ish «dashnori» i saj nuk zotëron as pasuri dhe as leje të vlefshme qëndrimi në Zvicër.

Ai ka thënë para gjykatës se në tëe vërtetë ai është i mashtruari në këtë mes. Kjo pasi që gjatë tregtisë së tij me patundshmëri në Kosovë është mashtruar nga shitësit.

Dënimi ende nuk është i plotfuqishëm./albinfo/