Dëmi material që ka pësuar Medvegja vlerësohet deri në 100 milion dinarë

Medvegjë – Shtabi komunal për situata të jashtëzakonshme ka formuar Komisionin për vlerësimin e dëmeve të shkaktuara nga fatkeqësia elementare në tokat bujqësore, në objektet ndërtimore dhe në objektet tjera si dhe Komisionin për vlerësimin e dëmeve të shkaktuara në infrastrukturën rrugore.

Deri më tani dëmet materiale janë vlerësuar të jenë ndërmjet 60 dhe 100 milion dinarë.

Kryetari i komunës, Sllobodan Drashkoviq ka biseduar me kryetarin e Trupit Koordinues për komunat Preshevë, Bujanoc dhe Medvegjë, Zoran Stankoviq për kompensimin e dëmeve të shkaktuara në komunën e Medvegjës.

Sipas fjalëve të kryetarit Drashkoviq, duke pasur parasysh kriteret rigoroze të Ligjit të ri për menjanimin e pasojave të përmbytjeve në Serbi, komuna e Medvegjës sipas të gjitha gjasave nuk do të mund t’i marrë të gjitha mjetet e kërkuara nga Trupi Koordinues.

Ju rikujtojmë se në Medvegjë me datën 31 korrik është shpallur gjendje e jashtëzakonshme e cila vazhdon të mbetet në fuqi. (mepress.info)