Demarkacioni nxit protesta dhe trazira

Qeveria e ka proceduar marrëveshjen për demarkacionin në Kuvend, edhe pse janë shpalosur fakte se ka gabime serioze, që mund ta dëmtojnë territorialisht Kosovën, nëse deputetët e miratojnë ashtu siç është nënshkruar nga Qeveria ‘Mustafa’.

Kosova dhe Mali i Zi ngecin në vijën kufitare

Opozita akuzon Qeverinë se po krijon huti në vend

Politikanë opozitarë thanë se marrëveshja është e dëmshme

Qeveria e ka proceduar marrëveshjen për demarkacionin në Kuvend, edhe pse janë shpalosur fakte se ka gabime serioze, që mund ta dëmtojnë territorialisht Kosovën, nëse deputetët e miratojnë ashtu siç është nënshkruar nga Qeveria ‘Mustafa’.

Dërgimi në Kuvend i projektligjit për ratifikimin e marrëveshjes për Demarkacion të kufirit me Malin e Zi do të mund të përshkallëzojë gjendjen në Kosovë, kanë paralajmëruar zyrtarë të partive politike në opozitë. Pak kohë pasi Qeveria e miratoi projektligjin dhe të njëjtin e nisi në Kuvendin e Kosovës për votim, Lëvizja ‘Vetëvendosje’ organizoi një protestë përpara ndërtesës së Kuvendit të Kosovës, në kundërshtim të marrëveshjes. Organizatorët e protestës qëndruan përpara Kuvendit deri sa u siguruan se projektligji për Demarkacionin nuk do të jetë në rend dite. Nënkryetar i VV-së, Dardan Sejdiu, derisa po mbahej protesta, u tha dhjetëra protestuesve se demarkacioni i kufirit mund të bëhet me një komision, i cili mbron interesat e Republikës së Kosovës”. “Demarkimin edhe mund ta bëjmë, por demarkim i cili është shkencor, që bazohet në interesat e Republikës së Kosovës, bazohet në hartat ligjore e legjitime”, tha Sejdiu.

Situata mund të eskalojë

Protestës së Lëvizjes ‘Vetëvendosje’ nuk iu bashkuan të enjten edhe dy partitë e tjera opozitare që e kanë kundërshtuar me forcë dhe përdorim të gazit lotsjellës marrëveshjen për Demarkacion. Por, zyrtarët e AAK-së në opozitë paralajmëruan kundërshtime edhe më të forta në rast se do të votohet për projektligjin e Qeverisë, të dërguar në Kuvend. Pal Lekaj, nënkryetar i AAK-së, njëherësh deputet në Kuvendin e Kosovës, tha për REL se me veprimet e saj Qeveria po krijon huti dhe po e thellon krizën politike në vend. “Çdo ratifikim i kësaj marrëveshjeje mendoj që do ta thellojë krizën institucionale politike dhe qytetarët do të revoltohen dhe do të eskalojë situata”, tha Lekaj.

Ai tha se AAK-ja ka besim tek të gjithë deputetët e Kuvendit se nuk do ta votojnë marrëveshjen aktuale për demarkacionin e kufirit me Malin e Zi dhe për këtë arsye edhe nuk i janë bashkuar protestës. “Nëse ndodh e kundërta, situata do të eskalojë nga vetë qytetarët”, tha Lekaj.

Qeveria e Kosovës mori të enjten në mëngjes vendimin për nisjen në Kuvend të projektligjit për ratifikimin e Marrëveshjes për Demarkacion me Malin e Zi, vetëm pak orë pasi u përmbyll një debat në tryezën shkencore-profesionale të Kuvendit të Kosovës, me pjesë- marrjen e deputetëve, ekspertëve, Komisionit Shtetëror, udhëheqësve të institucioneve dhe përfaqësuesve të shoqërisë civile.

Tryeza sërish shpërfaqi konfrontimet ndërmjet pushtetit dhe opozitës, që vazhduan të këmbëngulin në qëndrimet e tyre skajshmërisht të kundërta. Në fund të debatit, ndërkaq, 24 deputetë që kanë kërkuar organizimin e tij, kanë sjellë përfundimet se Komisioni Shtetëror ka bërë disa lëshime gjatë procesit në një segment dhe prandaj kanë kërkuar “rishikimin e sërishëm të procesit, duke kërkuar nga miqtë ndërkombëtarë që të ndërmjetësojnë ndërmjet dy shteteve rreth çështjeve kontestuese”./kosova sot/