Delegacioni nga Lugina ngrit çështjen e shqiptarëve edhe në Parlamentin Evropian

Këshilltarja e kryeministrit Kurti për Luginën e Preshevës, Ardita Sinani, përmes një postimi në Facebook, ka bërë të ditur se nga nesër, bashkë me anëtarët tjerë të delegacionit nga Lugina e Preshevës, do të jem në vizitë treditore në Bruksel.

Sipas saj, do të ngritet problematika e shqiptarëve të Preshevës, Medvegjës e Bujanocit në Parlamentin Evropian dhe Këshillin e Evropës.

“Pas ngritjes së problematikës së shqiptarëve të Luginës së Preshevës në Kongresin e Senatin Amerikan dhe në Organizatën e Kombeve të Bashkuara, adresa jonë e rradhës do të jetë Parlamenti Evropian. Nga nesër, së bashku me anëtarët tjerë të delegacionit nga Lugina e Preshevës, do të jem në vizitë 3 ditore në Bruksel për të ngritur problematikën e shqiptarëve të Preshevës, Medvegjës e Bujanocit në Parlamentin Evropian dhe Këshillin e Evropës”, ka shkruar ajo.

Sinani tha se për këto tri ditë në Bruksel, do të zhvillojnë 12 takime me udhëheqësit më të lartë të Këshillit të Evropës dhe Parlamentit Evropian.

“Pozita e vështirë e pakicës shqiptare në Serbi dhe diskriminimi konsistent do të jenë thelbi dhe tema kryesore e këtyre takimeve jashtëzakonisht të rëndësishme.Kushtëzimi i rrugëtimit të Serbisë në integrimet evropiane do të duhej të kushtëzohej me realizimin dhe plotësimin e të drejtave të shqiptarëve në Serbi në përgjithësi, e në veçanti në komunat Preshevë, Medvegjë e Bujanoc. Zgjidhja më afatgjate dhe më e duhura do të ishte implementimi i reciprocitetit në të drejta të serbëve që jetojnë në Kosovë dhe shqiptarëve në Serbi”, shkroi tutje ajo.