Delegacioni i Kosovës në Bruksel për planin e zbatimit të Marrëveshjes

Prishtinë – Delegacioni i Republikës së Kosovës ka udhëtuar në Bruksel për takimin e radhës për planin e implementimit të Marrëveshjes për normalizimin e marrëdhënieve ndërshtetërore ndërmjet Kosovës dhe Serbisë.

Në njoftimin për media thuhet se delegacioni i Kosovës shkon me qëllimin për të arritur marrëveshjen për implementimin, duke përfshirë çështjet e implementimit dhe definimet për afatet kohore, akterët e implementimit dhe çështjet konkrete.

“Ne theksojmë nevojën që marrëveshja të implementohet sa më shpejt, në mënyrën e paraparë në marrëveshje, për çka pala kosovare është e gatshme dhe pret një gatishmëri të tillë edhe nga pala serbe dhe faktorët ndërkombëtarë, si KFOR-i dhe EULEX-i”, theksoi zëvendëskryeministri Hajredin Kuçi, i cili kryeson delegacionin kosovar. Pjesë janë edhe koordinatori për bisedime, Blerim Shala, kryeprokurori i Shtetit, Ismet Kabashi, kryesuesi i Këshillit Gjyqësor të Kosovës, Enver Peci, dhe drejtori i Policisë së Kosovës, Shpend Maxhuni.(koha)